سالما سایه شهپرون ایتمه حجاب ای جبرئیل
ایتمرم گون ایسّیسندن اجتناب ای جبرئیل
هر قدر گون سوزش آرتورسا یوخومدور احتراز
گون دگه خوشدور بدنده زخم ایده سوز و گداز
ایلیه هر یاره ، یاره بر دیلیله کشف ِراز
وار سیزلتیمدا بیر عالی اکتساب ای جبرئیل
جلوگاه ِعشقده من وصلِ یاره مایلم
هر بلایه بیر بلی' لفظیله دلدن قائلم
من اوزوم اوز نفسیمه جان اوسته ایندی حایلم
محضر ِجانانه قیلّام اضطراب ای جبرئیل
شوق اوزیله گیمشم من ارغوانی بیر لباس
کاسهء خورشید ایدر بو رنگدن نور اقتباس
ایلورم گون ایسّیسندن شِکوه ایلورسن قیاس
سرّی واردور آرتورور گون التهاب ای جبرئیل
بیله فکر ایتمه دگور گون یاره لی جسمیم یانور
گون اوزی باخدوقجا بو احواله دلدن اودلانور
هانسی عاشق من کیمی جانویرماقی آسان سانور؟
سوزشیم آرتدوقجا اولّام کامیاب ای جبرئیل
تابش ِخورشید دگسون قوی ساری گُل تک سولوم
اوخ اوخ اوستن جسمیمه دگسون خدنگیله دولوم
ایلیوم اوز عشقیمی ظاهر فنا فی الله اولوم
خونبهام اولسون خدای مستطاب ای جبرئیل
گون گورور اوز علّت ایجادینی خونین بدن
اودلانور دلدن ایدور سوزِ نهانی سین علن
گیت دایانما قوی منی بو حالیله قان ایچره سن
من یانوم یانسون بو حاله آفتاب ای جبرئیل
سوزِ آهیم یاندورور کون و مکان اهلین یاخور
زخم ِتیریله مکانِ لامکاندان قان آخور
شهپرون قوزا که ساقِ عرشیدن جدّیم باخور
حالیمی قوی گورسون اول ختمی مآب ای جبرئیل
هر او اوخکه بیر طرفدن جسمیمی ناحق دلور
قان آخور یاحق یازور یرده وجودیم دینجلور
باشیم اوسته ناله کنان بیخانمان زینب گلور
سن دایانما گورسن اولماز سنده تاب ای جبرئیل
شدّتِ سوز ِعطشدن اود دوشوبدور جانیمه
تشنه دور شمرِ جفاجو و ستمگر قانیمه
گوزلریمی باغلاسون زهرا گلوبدور یانیمه
باشیم اوسته اگلشوبدور بوتراب ای جبرئیل
باخمارام گر دولدورا دنیا و مافیهانی سو
آلموشام اوزقانیمیله آخر عمریمده وضو
عاشق و معشوق آراسیندا عجب عالمدی بو
عین عزّتدور بو رنج و پیچ و تاب ای جبرئیل
سایبانی نیلورم ردّ ایله ظلّ شهپری
گون قاباقینده سالوبلار مظهرِ پیغمبری
گیت دولان میداندا تاپ نعشِ علی اکبری
شهپرون اول مه جماله قیل حجاب ای جبرئیل
شاهبازِ ذُروهء اعلا دوشوب بی پرّ و بال
گون اونا آرتورسا سوزش منده آرتار ابتهال
گیت کنارِ نهرده سایه علمدار اوسته سال
یوخ آناسی ایله بیر فعلِ ثواب ای جبرئیل
ایلمه تکلیفِ آب ، حوضِ کوثردن منه
احتیاجیم یوخ سویا هر چند زحمتدور سنه
وار سویون گیت خیمه گاهیمده نظر قیل شیونه
ویر سوسوز قیزلاریما بیر جرعه آب ای جبرئیل
سالما سایه ، چکمه زحمت من تب و تابه خوشام
ساخلا ناقص خدمتون قیل شام شهرینده تمام
عترتِ طاها اولان گون واردِ بازارِ شام
شهپرون زینب یوزینه قیل نقاب ای جبرئیل
گرچه اولموش اوز گناهیندن (حسینی) شرمسار
لیک مستخدیمدی بو درباره،منده حقی وار
قویمارام ذلّتده ، راضی اولمارام چکسون فشار
لطف اوزیله ایلرم بیر فتح باب ای جبرئیل.
- یکشنبه
- ۷
- شهریور
- ۱۴۰۰
- ساعت
